I Hundvin Naturbarnehage ser vi måltidet som meir enn berre mat – det er ein viktig del av omsorga, fellesskapet og læringa i kvardagen.
- Sunne og varierte måltid
Barna får frukt kvar dag og eit varmt måltid jamleg, ofte laga saman med barna ute på leirplassen. Vi følgjer Helsedirektoratet sine retningslinjer for mat i barnehagen, med fokus på variert, næringsrik og sunn kost som gir energi til leik og læring. - Gode rutinar og mathygiene
Vi har faste rutinar rundt måltida som skaper føreseielegheit og tryggleik. Handvask før og etter måltid er ein sjølvfølge, og vi har fokus på hygiene både i tilbereding og servering av mat. - Måltidsglede og fellesskap
Måltidet skal vere ei triveleg stund der barna opplever fellesskap og ro. Vi sit saman rundt bordet, deler maten, ventar på tur og øver på gode bordvanar. Dei vaksne deltek aktivt for å skape eit inkluderande miljø der alle blir sett og høyrt. - Språkkompetanse ved bordet
Måltida er også ein arena for språkleg utvikling. Gjennom samtale rundt bordet får barna moglegheit til å uttrykkje tankar, stille spørsmål, dele opplevingar og lytte til andre. Vi legg til rette for gode samtalar og gir barna nye ord og omgrep knytt til mat, smak, lukt og opplevingar.