Følgjande vedtekter vert gjort gjeldane frå 01.01.26          

§1 Eigartilhøve

Barnehagen er eigd og driven av Hundvin Naturbarnehage AS. Charlotte N. Grimstad eig 100 % av aksjane og er styreleiar. Styret er oppnemnt av eigar.

§ 2 Lovverk

Barnehagen vert driven i samsvar med barnehagelova med forskrifter, rammeplan for barnehagen, samt gjeldande lover, forskrifter og retningslinjer frå Kunnskapsdepartementet. Årsplan, kvalitetssikringsplan og barnehagen sine målsetjingar er lagde til grunn.

§ 3 Føremål

Barnehagen skal, i samarbeid og forståing med heimen, vareta barna sitt behov for omsorg og leik, og fremje læring og danning som grunnlag for allsidig utvikling. Barnehagen skal byggje på grunnleggjande verdiar i kristen og humanistisk arv og tradisjon, slik som respekt for menneskeverdet og naturen, åndsfridom, nestekjærleik, tilgjeving, likeverd og solidaritet – verdiar som kjem til uttrykk i ulike religionar og livssyn, og som er forankra i menneskerettane.

Barna skal få utfolde skaparglede, undring og utforskartrong. Dei skal lære å ta vare på seg sjølve, kvarandre og naturen. Barna skal utvikle grunnleggjande kunnskapar og ferdigheiter, og dei har rett til medverknad tilpassa alder og føresetnader.

Barnehagen skal møte barna med tillit og respekt, og anerkjenne barndommen sin eigenverdi. Barnehagen skal bidra til trivsel og glede i leik og læring, og vere ein utfordrande og trygg stad for fellesskap og venskap. Barnehagen skal fremje demokrati og likestilling og motarbeide alle former for diskriminering.

Jf. barnehagelova § 1.

I alt arbeid i Hundvin Naturbarnehage skal omsynet til barnet sitt beste vere grunnleggjande.

Barnehagen vert driven i samsvar med:

a)       barnehagelova og forskrifter, samt retningslinjer fastsette av Kunnskapsdepartementet til ei kvar tid

b)       rammeplan for barnehagen

c)       vedtak i Hundvin Naturbarnehage AS

d)       årsplan/verksemdsplanar for barnehagen

e)       lov om internkontroll og barnehagen sine eigne rutinar for tryggleik og internkontroll

f)        forskrift om miljøretta helsevern i barnehagar og skular

§ 4 Barnehagen sine organ

Eigarstyret

Hundvin Naturbarnehage er underlagt styret ved eigar. Eigarstyret har det økonomiske ansvaret for selskapet og skal vere eit kontrollorgan for barnehagen. Dagleg leiar/styrar i barnehagen har hovudansvar for den daglege drifta og for at drifta er i samsvar med § 2 og § 3 i desse vedtektene.

Samarbeidsutvalet

a)       Samarbeidsutvalet (SU) er eit rådgjevande, kontaktskapande og samordnande organ.

b)       Barnehagen kan etablere samarbeidsutval på avdelingane. Samarbeidsutvalet skal bestå av éin representant for foreldra, éin representant frå personalet og styrar/dagleg leiar. Eigar kan delta dersom dette er ønskjeleg. Styrar har møte- og uttalerett, men ikkje stemmerett. Samarbeidsutvalet konstituerer seg sjølv.

c)       Representantar for foreldrerådet og dei tilsette vert valde for eitt barnehageår om gongen.

d)       Samarbeidsutvalet held møte når det er nødvendig, etter initiativ frå leiaren, eit medlem i SU eller eigarstyret. Styrar kallar inn til første SU-møte; seinare er det leiaren i SU som kallar inn. Det skal gjennomførast minimum to SU-møte i kvart barnehageår.

e)       Ved likt tal stemmer avgjer leiaren si stemme.

f)        Samarbeidsutvalet skal mellom anna behandle årsplanen for den pedagogiske verksemda. SU skal få saker lagde fram og har rett til å uttale seg i saker som er viktige for barnehagen sitt innhald, verksemd og forholdet til foreldra – til dømes budsjett, driftsendringar og utnytting av areal ute og inne.

Foreldrerådet

a)       Foreldrerådet består av foreldre/føresette til alle barna i barnehagen. Foreldrerådet skal fremje samarbeidet mellom heimen og barnehagen.

b)       Foreldrerådet kan be om å få saker lagde fram som er viktige for foreldra sitt forhold til barnehagen. Foreldrerådet har rett til å uttale seg før avgjerd vert teken. Innkalling til foreldrerådsmøte skjer med 14 dagars varsel, og sakliste skal leggjast ved. Dagleg leiar/styrar er ansvarleg for utsending av innkalling.

c)       Ved avrøysting i foreldrerådet har kvar familie éi stemme, og vanleg fleirtalsvedtak gjeld.

d)       Foreldrerådet kan vedta at foreldrebetalinga kan setjast høgare enn maksimal sats, jf. forskrift om foreldrebetaling i barnehagar § 4.

Foreldremøte

Det skal haldast minst to foreldremøte i året. Tema for foreldremøta skal drøftast i SU.

§ 5 Opptak – oppseiing

Opptak

Alver kommune har samordna opptak, og Hundvin Naturbarnehage er ein del av denne opptaksordninga. Elektronisk søknadsskjema finn ein på Alver kommune si heimeside under barnehagar.

Søknadsfrist til hovudopptaket er 1. mars.

Barn som får tildelt plass i barnehagen, får behalde plassen fram til skulestart, eller til foreldre/føresette seier opp plassen skriftleg. Barn frå andre kommunar får behalde plassen eitt barnehageår om gongen.

Opptaket vert gjort i samsvar med barnehagelova. Opptak vert gjort på bakgrunn av prioriteringane i søknaden.

Opptakskriterium

Dersom barnehagen ikkje kan tilby plass til alle som søkjer, skjer opptak etter denne prioriteringa:

1)       Barn av tilsette og eigar i selskapet.

2)       Utviding av plass for barn som allereie har plass i barnehagen.

3)       Søsken av barn som har plass i barnehagen.

4)       Fagleg skjønnsvurdering ut frå alder og gruppesamansetjing.

Opptakskriteria gjeld under føresetnad av at nødvendig dokumentasjon ligg ved søknaden.

Opptakskrets

Barn som er busette i Alver kommune, vert prioriterte. Dersom det er ledige plassar, kan barn frå andre kommunar få plass.

Plasstypar

Hundvin Naturbarnehage har følgjande tilbod:

•          100 % plass – 5 dagar per veke
•          60 % plass – 3 dagar per veke
•          40 % plass – 2 dagar per veke

Tilbod om 3- eller 2-dagars plass kan gjennomførast dersom barnehagen ikkje sit att med tomme plassar, og dersom det ikkje medfører behov for auke i pedagognorma.

Ved ledig kapasitet kan foreldre/føresette som har barn med redusert plass, kjøpe einskilddagar. Dette må avtalast med pedagogisk leiar på avdelinga. Prisen per dag er kr 200 og vert belasta foreldrebetalinga i juli.

Klage på opptak

Ved hovudopptak kan søkjar klage over avslag på søknad om barnehageplass. Søkjar kan også klage dersom søkjaren ved tildeling ikkje får oppfylt verken første eller andre ønskje om barnehageplass.

Ved supplerande opptak kan berre søkjarar med lovfesta rett til prioritet etter barnehagelova § 16 klage dersom dei ikkje får tilbod om plass i den aktuelle barnehagen.

Permisjon

Ved barselpermisjon, mellombels flytting og liknande kan det søkjast om permisjon frå barnehageplassen. Permisjon kan gjevast for heile eller halve barnehageår, og vert vurdert mellom anna ut frå om eit anna barn kan fylle plassen. Permisjonssøknaden må vurderast opp mot ledige plassar for det barnehageåret barnet kjem tilbake.

Søknad om permisjon skal vere skriftleg og sendast dagleg leiar minst éin månad før permisjonen skal gjelde.

Oppseiing / endring av plass

Ved ønskje om endring av plass må det liggje føre ein skriftleg søknad.

Endring av plass kan gjennomførast dersom barnehagen ikkje sit att med tomme plassar.

Gjensidig oppseiingsfrist er to månader rekna frå den 1. i månaden etter at oppseiinga er levert. Oppseiinga skal vere skriftleg. Dersom oppseiinga blir levert 1. mars eller seinare, må det likevel betalast ut barnehageåret. Reglane for oppseiing gjeld frå og med føresette har stadfesta at dei tek imot plassen.

§ 6 Opningstider / ferie

•          Barnehagen held ope måndag til fredag kl. 07.00–16.30.
•          Barnehagen er stengd julaftan og nyttårsaftan, og stengjer kl. 12.00 onsdag før påske.
•          Barnehagen er stengd dei fem planleggings-/kursdagane personalet har i løpet av året.
•          Barnehagen er stengd veke 29 og 30.
•          Hovudferie på avdelinga er veke 27, 28, 29, 30, 31 og 32.
•          Barnet skal ha tre veker samanhengande ferie i hovudferieperioden, i tillegg til éi veke utanom.
•          Hovudferien skal meldast til styrar i veke 15. Den 4. ferie veka skal meldast seinast ei veke før ho vert teken ut.

§ 7 Barnetal, alder og arealutnytting

Barnehagen tilbyr plassar til barn i alderen 1–5 år.

Norm for leikeareal inne er minimum 4 m² per barn over 3 år, og om lag ein tredel meir per barn under 3 år.

Utearealet bør vere om lag seks gonger større.

Godkjent uteområde for Hundvin Naturbarnehage er området rundt avdelinga, Leirplassen og Spindelvevskaret.

§ 8 Barnehagen sitt personale

Barnehagen følgjer krav til pedagogisk og grunnbemanning i samsvar med barnehagelova §§ 24–26 og gjeldande forskrifter.

Eigar og styrar tilset personalet. Det skal leggjast fram politiattest ved tilsetjing. Alle tilsette får eigen arbeidsavtale.

§ 9 Foreldrebetaling

Det er styret i Hundvin Naturbarnehage AS som fastset foreldrebetalinga etter statlege føringar og pålegg.

Kostpengar kjem i tillegg.

Foreldra betaler for 11 månader i året; august er betalingsfri.

Barnehagen følgjer statleg søskenmoderasjon.

Dersom barnet blir levert før opningstid eller henta etter stengetid, kan barnehagen krevje eit tillegg tilsvarande gjennomsnittleg lønnsutgift per time (kr 250 per time).

Dersom foreldre ikkje nyttar plassen barnet har i barnehagen, og det ikkje ligg føre oppseiing, har ein ikkje krav på å få tilbakebetalt innbetalt foreldrebetaling.

§ 10 Misleghald

Ved misleghald av betaling kan barnehagen krevje renter for sein betaling. Gjenteke misleghald kan utgjere eit vesentleg misleghald. Ved vesentleg misleghald kan barnehageplassen seiast opp med omgåande verknad. Før oppseiing på grunn av misleghald av betaling skal barnehagen varsle føresette skriftleg om konsekvensane og gje ein frist på 14 dagar til å rette opp forholdet.

§ 11 Ansvar

Hundvin Naturbarnehage sitt personell har ansvar for barna den tida dei er i barnehagen.

Hundvin Naturbarnehage har ulykkesforsikring for alle barn som har plass i barnehagen.

Hundvin Naturbarnehage står ikkje økonomisk ansvarleg dersom eigedelar til brukarane blir øydelagde eller forsvinn i barnehagetida.

Hundvin Naturbarnehage kan ikkje krevje at brukarane står økonomisk ansvarlege dersom eigedelar til barnehagen blir øydelagde av brukarane i barnehagen si opningstid.

§ 12 Frammøte ved sjukdom

Sjuke barn skal ikkje opphalde seg i barnehagen.

Ved tvilstilfelle avgjer styrar om eit barn, på grunn av sjukdom, ikkje kan eller skal vere i barnehagen. Dette av omsyn til barnet det gjeld og barnegruppa.

§ 13 Internkontroll

Barnehagen skal ha eit internkontrollsystem i samsvar med forskrift om systematisk helse-, miljø- og sikkerheitsarbeid. Dokumentasjon vert oppbevart i barnehagen. Internkontrollsystemet vert utarbeidd og kontinuerleg oppdatert av styrar.

§ 14 Forvaltning og tilsyn

Kommunen fører det lokale tilsynet med barnehagen.

§ 15 Teieplikt og opplysningsplikt

Alle som utfører teneste eller arbeid etter barnehagelova, har teieplikt etter barnehagelova § 44, jf. forvaltningslova §§ 13 til 13 g.

Tilsette har også opplysningsplikt til barneverntenesta etter barnehagelova § 46.

§ 16 Politiattest

Barnehagelova § 30 krev at den som skal tilsetjast fast eller mellombels i barnehage, skal leggje fram politiattest som nemnt i politiregisterlova § 39 første ledd. Barnehageeigar og kommunen som barnehagemyndigheit kan krevje politiattest for andre personar som jamleg oppheld seg i barnehagen eller har vesentleg innverknad på drifta.

§ 17 Helsekontroll av barn og personale

Før eit barn byrjar i barnehage, skal det leggjast fram erklæring om barnet sin helsetilstand slik at barnehagen kan leggje forholda til rette for barnet. Dersom barnet har møtt til ordinære undersøkingar på helsestasjon, kan slik erklæring givast av foreldra/føresette. Barnehagen sitt personale har plikt til å gjennomgå tuberkulosekontroll i samsvar med gjeldande regelverk.

Jf. barnehagelova § 50.

§ 18 Vedtektene si varigheit

Vedtektene er fastsette av styret i Hundvin Naturbarnehage AS. Styret kan gjere endringar ved behov.

Charlotte Grimstad

Dagleg leiar og styreleiar i

Hundvin Naturbarnehage